وعيتي ع فجر

Admin المساهمات : 624 تاريخ التسجيل : 16/01/2013

وعيتي ع فجر الربيع ببيتك المهجـور باين علـيكي التعب شفتو بمحـــــياكي
و لما فتحتي شـــــبابيك الهوى للنـور فرحـو طيور الهـوى ع حسن ملقـاكي
تمنيت حالي أنا لو كنت شي عصفـور عالبيت فـــوت و بحالة شوق القـاكي
عالنور ادخل تا انسى عـتمة الديجـور و المـح خــيالك قبل ما القلب ينساكي
و حـد المرايا تا شوف خيالك المنثور نفِّض جناحي و بلهفه قــول محـلاكي
هـــونيك لما تركتي عالـمرايي عطـور تنشقت عـطر الصبا وسمعت مغــناكي
تذكرت أنو عجنب البيت مرج زهـور البستان ناطــر تزوري و كم ترجاكي
شايف بعينو النظر من طلتك مبهــور بيشكر اله السـما هالحسن أعطــاكي
بحبك .. بحبك ولكن في البعـد معذور انتي النقيه و جمال الروح حيّــــاكي
مهما وصفتك ما بقــدر عاند المقدور وردة حـــياتي ما زال القلـب سمّـاكي
من شَعر حالم ع كتفك نازل ومسرور وعّى الجمال و ع يقظة حلم وعــاكي
و الفجر يلي ع تمك شايفـــو منحـور هــدهــد ســـرير الغفا تا راح غفـّاكي
ما شفت نور الشمس بجدايلك مكسور غل بجناها و خـيوط الشمس أهــداكي
عالخد كان الحلا من روعـتك مسحور عـــاف الطبيعة و من الوردات نقـاكي
انتي جـمال الطبيعه بخاتــمك ممهور سبحان يللي بأجـمل سـحر خــــلاكي
قديش قلبي بحبك خاطــــــرو مجبور ما ذاق طعم الهـــــــنا بالعمر لولاكي