في كـل ضيعة بكـل أقطار الدنـي

Admin المساهمات : 624 تاريخ التسجيل : 16/01/2013

في كـل ضيعة بكـل أقطار الدنـي
عم يحكم المجنون والشاعر سوى
والعبقريــة ...... بـالتنيـن مبيني
بــس الفـرق بيناتهـم بـالمحتـوى
يمكن شــعورو ضيع العقل الغني
ويمكن جنونــي بالشعر مالـو دوى
+-+-+-+-+-+-+-+-+-+-+-+-+-+
مجنون عم يرسم خريطة ع التراب
والريح عـم تمحي رسـومات الألـم
ويبقى الرسم بالذاكرة صورة عذاب
ومتلو أنـا صارت رســومي بالعدم
رسمت الأمل بريشة طموح الشباب
وقسوة الواقع مسحت كل شي انرسم
+-+-+-+-+-+-+-+-+-+-+-+-+-+
مجنون عم يحكي والحكي جر الحكي
وحروف ماعلقت ع حيطان الــسمع
يحكـي اللـي قالــو عندما كاين ذكي
و متلـو أنـا صار الحكـي عندي طمع
بحكــي و بـآخر كلمتـي غصة بكي
بعرف بأنـو اللـي حكيتو ما انـسمع
+-+-+-+-+-+-+-+-+-+-+-+-+-+
مجنون من كبر الأســى عندو ولوع
عالدرب يركض عالشـمال و عاليمين
والنـاس عـم يتبسـمولـو .. ع الوقـوع
ومتلـو أنـا مصدر فرح رغـم الأنين
من حزن شـعري شبعت الدنيا دموع
والنـاس عـم يتبسـمولـي ... معجبين
+-+-+-+-+-+-+-+-+-+-+-+-+-+
مجنون عامل من عصا رفيق السرور
شالت همومـو و بعدت عنـو الخطـر
و منهــا ترك بالذاكرة عنو حضور
ومتلو ما عندي من البشر رفقة قدر
عرفت القلم وحدو رفيقي بالشــعور
لما الشــعور تحجر بصدر البشــر
+-+-+-+-+-+-+-+-+-+-+-+-+-+
مجنون ما عندو بقاموســو الأنـا
وحب الغنى بقلبو مافي عندو رصيد
عايش حياتو لاهموم و لا ضنــى
ومتلو أنا عندي الدهب متل الحديد
ما عرفت كيف من الفقر أخلق غنى
وعرفت أخلق من نبض قلبي قصيد