يا طير لو تعلم

Admin المساهمات : 624 تاريخ التسجيل : 16/01/2013

يا طير لو تعلم بأحوالي
بحريتي.. ما قلت نيالي
مسجون إنت و حر بالتغريد
لكن أنا سجني شغل بالي
مشغول بالي ع طفل بالعيد
شاف الغني جارو.. لبس غالي
وهو فقير وحالتو تنهيد
بيو اشترى تيابو من البالي
مشغول بالي عَ وطن بتزيد
فيه البطالي و ناس بطالي
وشايف دول من حولنا بتريد
تغمقلنا ... تتضل بالعالي
مشغول بالي من جهل بيقيد
بنفوس شــعبي نار قتالي
وبدل الكتب عم نشتري بواريد
مش تا نقوس عَ عدو احتل
لكن .. تنقتل خينا الغالي

يا طير كلما بيــسألك عني
سَمع البشر جاوب إنت إني
شاعر لساني تعود الحرمان
وماعاد رح ينصح ولا يتني
تعودت إنو الحق كيف ما كان
متل الكفر بالرب والجنة
تعودت إنو النقد بالأوطان
شـجرة عقيمة ما بقى تجني
وعايش ما بين الكفر و الإيمان
بـسأل و قلبي حامل الأني
ليش الله خلق فينا لسان
عضو زايد .. ما الو مِنـي
ياطير لا تزعل على الأغصان
غصونك وطن حريتك هِني
واضحك على الدنياو على الإنسان
يلي بكلمة عالسجن بيفوت
لكن إنت مسجون.....تا تغنّي

يا طير شو اللي جابرك فيي
بالقفص تبقى قبال عيني
حريتك ما بتنشرى بالمال
و حريتي ع المال مبنيي
حريتك بجناح ما بينطال
بوسع السما ..غنيت غنيي
و حريتي لو حطت الترحال
بتكون وهم بوهم منهيي
بقلب القفص حريتك بتنال
و ال ساجنك مسجون بالنيي
بحريتك غنيت فاضي البال
وهو انسجن تا يسمع شويي
الإنسان سجن..بيحبس الآمال
وحريتو واحد من الميي
ما فيه يتخلى عن الأغلال
ما زال ربو خالقو مسجون
صعبي عليه يعيش حرية

» ليتكَ تعلم أنَ حبي لكَ طاف العالمين