المدير العام
Admin
المساهمات : 624
تاريخ التسجيل : 16/01/2013
 |  موضوع: غنو الشباب وبينو كثير  الثلاثاء فبراير 19, 2013 1:53 am | |
| غنو الشباب وبينو كثير وقليل
وساكت انا ومسلح بصبر الجميل
ما ضل بالميدان الا بوعلي
ان كنت قد الحمل شّرف يا خليل
خليل
يا زين كنك جيت تعزمني الي
شد العزيمة وقد مافيك اعتيلي
من جهتي قبلت العزيمة وجيت ليك
عا شرط بدك انت تبقى بو علي
زين
قبلت العزيمة وجيت ان كنك نشيط
خليك ساكت لا صياح ولا عييط
بتبقى تحسب زين منو بو علي
ان ضل فيك محل مش آكل خبيط
خليل
نحنا بسلاح العقل النا الانتصار
وانكنت جايي للخبيط وللنقار
فتش على انسان متل حكايتك
يكون عقلو زغير وزنودو كبار
زين
انكان الذكي غير الشعر مش فايدو
والحرب لا من شيمتو ولا عوايدو
ما كان عنتر عبس في زندو القوي
علق على بيت الحرام قصايدو
خليل
عنتر قوي بالعقل والقوي كمان
ولقصايدو وسيفو اجير العقل كان
شمشون من دون عقل كانت قوتو
بهنيك يا شمشون آخر ها الزمان
زين
لما لقيت الكون منو مستقيم
وجايي على المسرح وناطرني الخصيم
شعري وشَعر شمشون جايبهن سوى
منشان اقضي عالفهيم وعالغشيم
خليل
ما زال شجرة فقر حالك جانيي
شِعر وشَعر طلعت عا حالك جانيي
بالشِعر رح زغر مقامي وقابلك
وبالشَعر ببعتلك دليله تانيي
زين
زغر مقامك موت لديار البلي
وغني شعر يا هويدلك يا هويدلي
وعندما بتصبح دليلة يا خليل
بتقشع علي الزيبق بخدمة بو علي
خليل
في اربعين يازين من ماضي السنين
كان قايدهم علي بابا الحزين
وهلق انت والزيبق وابنك علي
النا الشرف صرتو تلاتي واربعين
زين
صرنا تلاتي واربعين يا رب عين
واحفظ عبادك عالشمال وعاليمين
والنا الشرف لما خليل روكز يجي
منصير ام اربعة واربعين
خليل
كنتو قبل مني تلاتي واربعين
فرقة علي وبراس واحد عايشين
صار في لكن راسين بوجودي انا
راس باب الغدر والبابا الامين
زين
البابا البروما اسم مرفوع اللوى
كرمال عينو بصلب الخمسة سوى
لكن انت بالبابوية يا خليل
بابا حسن ما كنت اوجدلك دوى
خليل
زين وحسن هودي ولادي شي حسن
ولما حسن اكثر من الاول حسن
هوني رضيت على حسن وحرمت زين
ومن هيك صارت كنوتي بابا حسن
زين
الزين لما شاهدك منزوع هيك
منك تبرأ وقلب خيو هفت عليك
بتقدر بتعمل عالعمر بابا حسن
لكن تا تعمل بو علي صعبي عليك
خليل
لما لقيت ابن مش طالع الي
عملت حالي بو حسن عن مرجلي
العيبة على البيكون اسمو بو حسن
عا شخص مش حرزان يعمل بو علي
زين
كنوة بو علي وبو حسن للديِن ديَن
هو مش الك هودي اسامي المسلمين
ومهما بالاسمين تعمل مرجلي
اركع عند ما يطل زين العابدين
خليل
يا واضع مقامك بمركز مش الو
رغم البشاعة الفيك بتسب الحلو
ليش تا بيحقلك تعمل نبي
وغيرك اذا بيحفظ امانة بتقتلو
زين
اسم الخليل لا تعملوا لعبة بيديك
هيدا اسم ما بيقبل زنوبات هيك
انت مش حافظ امانة يا خليل
انت لابس اسم ومبهبط عليك
خليل
مظبوط اسمي فوق جمسي مكّبرو
وحاسب حساب البعد بدهن يظهرو
وانت العاجسمك اسم زين العابدين
كلما كبر عمرك حروفو بيزغرو
زين
اسم انزغر شو همني اسمي بلاه
البيهم انو الجسم يسلم من بلاه
بتقدر تقلي عن مسيحك يا خليل
بالاسم او بالروح بتعدو الآه
خليل
الله عطا الدنيي اسم عا قدها
ولوما الاسامي الناس جهلت حدها
وتنقول جبنا روح اطهر من مسيح
وما كان الها اسم شو بتعدها
زين - قصيد
عم شوفك يا روكز فايق وغافي
وعقلك سميك كتير متعافي
ومهما بفلسفتك تشد طلوع
بيضل طولك طول صفصافي
تا يضل بكتاب الزجل مطبوع
اسمك، واحملكن على كتافي
شد الفارم وزمر على الكوع
وروّق وخلي منطقك دافي
بالاسم حاجي تكبر المشروع
متل البيمشي عا الجمر حافي
تنعشر اسم ما بيكسرولك جوع
ولا الابجدية قطر عا كنافي
الارواح مركب والاسامي قلوع
بتمشي بمشيئة سرها الخافي
وللروح بعمل اسم مش ممنوع
بيضل اسم الرب عا شفافي
ومنشان معنا ينتهي الموضوع
بعطيك جملة من قلب صافي
لما وقف عا الجلجلة يسوع
ما طلب منو الاسم بيو
قلو اعطيني قلبك وكافي
خليل – قصيد
يا زين خلي البحث بمحلو
ورد الجماعة بعد ما فلو
حاجي على ذوقك تحاكيني
حكي انت بتعجز تحلو
وروح افتخر انك معاديني
وكول خبز بتعجز تهلو
اللي قال نحنا من فرد طيني
بيريد يكبرك شو منعملو
نكرت الاسم يا زين عالهيني
والكون مبني عا الاسم كلو
ولو ما الاسم بدينك وديني
كانو البشر ما بيعرفو يصلو
يا ريت فيك يا زين تهديني
عا جسم من دون اسم تا جلو
ولو ما السفينة اسمها سفينة
من فعلها في اسم بيظلو
والله اللي قال العقل زيني
لما لابنو عا السما دلو
مضبوط قلو قلبك اعطيني
طيب ، ولو ما القلب اسمو قلب
شو بتفتكر كان لازم يقلو
زين – قصيد
واحد عا اسمو حط كل امالو
وواحد بروحو كل رسمالو
وانتو انصفو بالفرق يا اخوان
ما بين جسم الشخص وخيالو
بالاسم صاحبنا خليل قنعان
شو ها الذكاوي الفيه نيالو
مش لايمو يمكن يكون فهمان
وخالو ذكي طالع لاخالو
حاجي يا روكز بالاسم وهمان
من حروف حبر على ورق سالو
اسمك اذا شطبتو من الاعلان
ورسمك بقي بيبقى على حالو
ومحل روكز اكتب سليمان
او جورج ما بيبوخ مودالو
بالاسم مهما عملت مش خسران
لولا حرقتو شو على بالو
مليوم اسم بساعتين زمان
بترشهن عالبي وعيالو
وبتمون الزنكيل والطفران
لكن اذا جسمك نزل عا القبر
صعبي عليك تعوض بدالو
خليل – قصيد[right]
ما اطولك يا ليل احزاني
عا هيك منطق شعر وغناني
ووين الضماير والحقايق وين
نامت وعين البطل سهراني
ووين المعري وعقل طه حسين
واليازجية وعقل جبراني
يروحو يجيبو مجمع البحرين
ويرصعوه بدرر قصداني
نكرت الاسم يا زين كيف لك عين
وحطيت جسم بعينة التاني
بحيث الجسم عندك مرجح عين
وبتريد متلك بيع وجداني
جبلي اسم حيدر ابو الحسنين
وجسم عنتر عبس او هاني
او دلني على جسم طير البين
وعا الانبيا العطيو الدني دياني
ماتو وضل الاسم جوهر عين
والله انعرف بالاسم فوقاني
ما في جسم خالد على الحالين
اخلص بقا من الوهم منشاني
تا ينتهي ها البحث بين تنين
بين الجنا للحق والجاني
وحتى تآمن بالاسم يا زين
فتش تواريخ الدني بتشوف | |
|
