يا ريت فيي قلها

Admin المساهمات : 624 تاريخ التسجيل : 16/01/2013

يا ريت فيي قلها كل شــي ورَد
ع البال من دون المشاكل و العقد
مازال كل ما بشوفها بنسى الكلام
وبصير هجي كلمتي متل الولد
وبـروح دور ع الكــلام بإهتمـام
بعيــون ســر الأبجديـة بينوجد
وبدل ما لملـم معانـي للغرام
بتضيع رحلة نظرتي بعيونهــا
متل لحظة ضايعة بعُمر الأبد

وبصحى ع نغمة صوت من حلم الوعي
بكلمة.... بترسم حلم تاني بمسمعي
وبطير مابين الــسما وأرض الوجـود
بكتب على الغيمات كلمة بإصبعي
هيك الدني... حطت على روحي قيود
وعملت فرق ما بين قلبي .. ومرجعي
وحتى ما إحكي والحكي يرسم حدود
يا ريت فيكي توصلي صوب الغيوم
تقري الكتبتو بلحظتين ..... و ترجعي

يمكن ما فيكي تجاوبيني ع الطلب
الرحلة بعيدة و الدرب كلــو تعب
لكن...ما في عندي صبر تا تعرفي
شو اللي كتبتو تا عليي ينحسـب
من هيك .. بشحد من الغيمة موقفي
بتشفق عليي ..من بعد علم السبب
بتنزل مطر ما بيعترف بالفلــسفة
والأرض تخـلق أبجديــة بالــورود
و كل شي كتبتو على الغيمة ينكتب

شو نفع كلمة ما انعرف مضمونها
بالصمت...متل اللي كأني بخونها
ياريـت فيي رجـع الماضي البعيد
وسهر ليالي العشق مع مجنونها
وأسكت..وتسكت،والصمت هلق مفيد
صمت القداسة ....الآلهة بيصونها
و أمسك بإيدي إيدها وبغير إيد
فتش بليل الشَعر عن ضو النهار
وأكتب بنظراتي الحكي ع عيونها